Hoe Ek Volle Versadiging in Jesus Gevind Het

Hierdie getuienis van Ds. Etienne Maritz is ‘n opvolg op sy videoboodskap: Die Here het My Verlos van Tipiese Toronto “Blessing” Ervaringe. In hierdie tweede video getuig hy veral hoe die Here Jesus Hom nog ryker aan hom openbaar het. Daardeur het hy op ‘n dieper wyse ontdek dat die Here Jesus alleen die middelpunt van herlewing is. Hy is die Brood van die Lewe. Hy is die Lewe! Herlewing is dus ‘n nuwe openbaring van Jesus! Johannes getuig daarvan wanneer hy sê: “…en die lewe is geopenbaar en ons het Hom gesien…wat ons gesien en gehoor het, verkondig ons aan julle…” (1 Joh 1:2-4). Jesaja getuig twee keer in Jesaja 6: “…my oë het die Koning, die Here van die Leërskare gesien!” Die effek van so ‘n openbaring van die Here Jesus lei tot persoonlike geestelike herlewing. In hierdie video getuig Etienne Maritz dat hy in so ‘n ontmoeting met die Here Jesus, volle versadiging in Jesus alleen gevind het. Tydsduur: 1 uur 19 minute